سئویملی یولداشیم رضا کاظمی "حاجی قوربان" مطلبینین آلتیندا بله یازیب:
"سلام مهیار جان! یورولمایاسان. دوغرودان "باخشی" نه دئمکدیر؟ اونونلا بیزیم "آشیق" صنعتینده نه فرقلر وار؟ اوخشارلیقلاری ندیر؟ ایندی ـ "باخشی"ـنی نئجه و هانسی قایناقلاردان دینلمک اولار؟ "باخشی" اوخودوقلارینی هانسی قایناقدان الده ائدیر (فولکلوردان یوخسا شاعیرلرین سؤیلریندن؟) و ... بونلارا گؤره بیر آز بیلگی وئره بیلسن چوخ یاخشی اولار... ساغ اول... اؤپورم.
من بو بارهده اوخویوب یا ائشیتدیکلریمی یازیرام .
"باخشی" یا "بَخشی" سؤزجویو تورکمنلرده و خوراسان تورکلرینده (آیری تورکلرده بو سؤزجویون دئییلمهسینی ائشیتمهمیشم) دئییلیر و دئمک اولار بیزیم آشیقلار و تورکییهنین اوزانلاری کیمی خالق آراسیندا فولکلور ناغیللاری سازلا ایفا ائدرلر. چالدیقلاری ساز "دوتاردیر" آمما خوراسان تورکلرینین چالماغی تورکمنلرله فرقلیدیر.
هاوالارا گلدیکده چوخلو تانیش آدلارلا اوز-اوزه گلیریک، بو هاوالار خوراسان باخشی موسیقیسینین هاوالارینداندیر:
شاهختایی (شاختایی)، قرهجهبایو، گرایلی، زارنجی، جوئینی، اینچهیئل، آق نور، گوگلان (گویلآلان)، سالامه، تجنیس، اینجتمه (اینجلتمه)، دوزمهنه
باخشیلارین اوخودوغو ماهنیلار و ناغیللارین چوخو فولکلور خزینهسیندندیر، آمما اولابیلر کی اؤز شعرلریندن یا آیری شعرلریده اوخوسونلار. مثلن رحمتلیک "باخشی محمد حسین یگانه" اؤز ایفالاریندا قوچان شاعری "جعفرقولی"نین شعرلریندن فایدالانیب.
باخشیلارین اوخودوغو ناغیللاردان "اصلی-کرم"، "غریب - شاهصنم" ، "ابراهیم ادهم" ، "زهره – طاهر" ، "معصوم" ، "دوستمحمد – آیجمال" ، "شاه بهرام" ، "یوسف- زلیخا" ،"سلیمان – بلقیس"و ...س. نین آدینی چکمک اولار.
خوراسان تورکلرینین باخشیلاریندان من رحمتلیک" محمد حسین یگانه" و "حاجی قوربان سلیمانی"، "الیاقلی یگانه" و "علیرضا سلیمانی" نین آدینی چکمک اولار.
باخشی موسیقیسیندن نئچه آلبوم (کاست و CD) یایینلاییب.
1- موسیقی شمال خراسان – استاد حاج قربان سلیمانی / یایینلایان: ماهور- 1378
2- موسیقی شمال خراسان – استاد محمد حسین یگانه / یایینلایان: انجمن موسیقی ایران – 1378
3- داستان طاهر و زهره – استاد محمد حسین یگانه / یایینلایان: ماهور- 1382
4- موسیقی شمال خراسان(درگز)- بخشی اولیاقلی یگانه/ یایینلایان: ماهور- 1382
5- موسیقی ترکمن- بخشی نظرلی محجوب/ یایینلایان: ماهور- 1378
